Vel lokal valuta i utlandet
Når du bruker kort i utlandet, kan du ofte velje mellom norske kroner og lokal valuta. Vel lokal valuta for betre kurs.
Slik blir vekslingskursen fastsett når du bruker bankkortet ditt i utlandet
Når du betaler med kort i utlandet, blir beløpet automatisk rekna om til norske kroner. Her forklarer vi korleis vekslingskursen blir berekna – og kva valutapåslaget betyr for deg.
Kortnettverket fastset valutakursen
Kortnettverket (Visa) set ein dagsaktuell valutakurs som blir brukt når kjøpet blir gjort. Du kan sjå Visa sine kursar og rekne ut omrekning på ein bestemt dato i Visa sin valutakalkulator.
Banken legg til eit valutapåslag
Når du betaler i ei anna valuta enn norske kroner med bankkortet ditt, legg banken til eit valutapåslag. Dette dekkjer bankens kostnader ved valutaveksling.
Den endelege vekslingskursen du ser på kontoen din, består derfor av:
- Valutakursen frå Visa
- Bankens valutapåslag på 1,95 %
Valutakursar endrar seg frå dag til dag. Kursen som blir brukt, blir bestemt av datoen transaksjonen blir behandla.
Visste du at...
Informasjon om margin ved kjøp i EU/EØS
Ved kortbruk i valuta innanfor EU og EØS har du rett til å vite kor mykje bankens påslag utgjer på kjøpet i ei anna valuta, og få informasjon om skilnaden mellom:
- Vekslingskursen som er brukt på kjøpet ditt
- Referansekursen fastsett av Den europeiske sentralbanken (ECB)
Denne differansen viser kor mykje høgare bankens vekslingskurs er samanlikna med ECB-kursen.
Sjå dei daglege referansekursane til ECB her.
Døme: Slik kan eit kjøp i euro bli rekna om
La oss seie at du bruker bankkortet ditt til eit kjøp i Frankrike:
- Kjøp i lokal valuta: 10 euro
- Belasta beløp i norske kroner: 120,41 kroner
- Vekslingskurs: 12,041 NOK per euro
Denne kursen består av:
- Visa sin valutakurs på kjøpstidspunktet
- Bankens valutapåslag på 1,95 % for bankkort (som er inkludert i kursen)
Dersom ECB sin referansekurs same dag var om lag 11,73 kroner per euro, betyr det at vekslingskursen som er brukt, er omtrent 2,69 % høgare enn ECB-kursen. Ved hjelp av Visa sin valutakalkulator kan du òg sjå denne skilnaden for ein bestemt dato.
Nyttige tips når du bruker kort i utlandet
For å få mest mogleg gunstig valutaveksling kan du gjere følgjande:
- Vel alltid lokal valuta i betalingsterminalar og minibankar (til dømes euro i Spania). Då er det kortnettverket (Visa) som står for valutavekslinga, ikkje butikken eller minibanken.
- Unngå at terminalen vekslar beløpet til norske kroner. Dette kan gi ein dårlegare kurs.
- Sjekk valutakursen i mobilbanken dersom du vil ha ein indikasjon på kva eit kjøp vil koste.
- Hugs at valutakalkulatoren i mobil- og nettbanken gir ein rettleiande kurs.
Banken legg i tillegg på valutapåslag ved bruk av kort. Valutapåslaget kan variere mellom korttypar. For bankkort (debetkort) er påslaget 1,95 %, medan Eika kredittkort frå Kredittbanken har eit valutapåslag på 2 %.
Visste du at?
Du finn ein valutakalkulator i mobilbanken. Han kan gi ein indikasjon på kva eit kjøp i utlandet vil koste i norske kroner.
